Comme l'amour de Dieu domine sur les autres amours

La volonté gouverne toutes les autres facultés de l'esprit humain,mays elle est gouvernee par son amour qui la rend telle qu'il est. Or,entre tous les amours, celuy de Dieu tient le sceptre, et atellement l'authorité de commander inseparablement unie et propre a sa nature,que s'il n'est le maistre, il cesse d'estre et perit.

Ismael ne fut point heritier avec Isaac, son frere plus jeune; Esaü fut destiné au service de son frere puisné; Joseph fut adoré, non seulement par ses freres, mays aussi par son pere, et voyre mesme par sa mere, en la personne de Benjamin,ainsy qu'il avoit preveu es songes de sa jeunesse. Ce n'est certes pas sans mystere que les derniers entre ces freres emportent ainsy les advantages de leurs aisnés. L'amour divin est voyrement le puisné entre toutes les affections du coeur humain; car, comme dit l'Apostre, ce qui est animal est premier, et le spirituel apres; mais ce puisné herite toute l'authorité, et l'amour propre, comme un autre Esaü, est destiné a son service; et non seulement tous les autres mouvemens de l'ame, comme ses freres, l'adorent et luy sont sousmis, mais aussi l'entendement et la volonté, qui luy tiennent lieu de pere et de mere. Tout est sujet a ce celeste amour, qui veut tous-jours estre roy ou rien, ne pouvant vivre qu'il ne regne, ni regner si ce n'est souverainement.

Isaac, Jacob et Joseph furent des enfants surnaturelz; car leurs meres, Sara, Rebecca et Rachel, estans steriles par natures, les conceurent par la grace de la bonté celeste; c'est pourquoy ilz furent establis maistres de leurs freres. Ainsy l'amour sacré est un enfant miraculeux, puisque la volonté humaine ne le peut concevoir si le Saint Esprit ne le respand dans nos coeurs; et,comme surnaturel, il doit presider et regner sur toutes les affections, voire mesme sur l'entendement et la volonté.

Et, bien qu'il y ait d'autres mouvemens surnaturelz en l'ame, la crainte, la pieté, la force, l'esperance, ainsy que Esaü et Benjamin furent enfans surnaturelz de Rachel et de Rebecca,si est-ce que le divin amour est le maistre, l'héritier et le supérieur, comme estant filz de la promesse, puisque c'est en sa faveur que le Ciel est promis a l'homme. Le salut est monstré a la foy, il est preparé al'esperance, mais il n'est donné qu'a la charité: la foy monstre le chemin de la terre promise, comme une colonne de nuee et de feu, c'est a dire claire-obscure; l'esperance nous nourrit de sa manne de suavité; mais la charité nous y introduit, comme l'Arche de l' alliance qui nous fait le passage au Jourdain, c'est a dire, au Jugement, et qui demeurera au milieu du peuple en la terre celeste, promise aux vrays Israëlites, en laquelle ni la colonne de la foy ne sert plus de guide, ni on ne se repaist plus de la manne d'esperance.

Le saint amour fait son sejour sur la plus haute et relevee region de l'esprit, ou il fait ses sacrifices et holocaustes a la Divinité, ainsy qu'Abraham fit le sien, et que Nostre Seigneur s'immola sur le coupeau du mont Calvaire; affin que, d'un lieu si relevé, il soit ouÿ et obei par son peuple, c'est a dire par toutes les facultés et affections de l'ame qu'il gouverne avec une douceur nompareille; car l'amour n'a point de forçatz ni d'esclaves, ains reduit toutes choses a son obeissance avec une force si delicieuse, que, comme rien n'est si fort que l'amour,aussi rien n'est si aymable que sa force.

Les vertus sont en l'ame pour moderer ses mouvemens, et la charité comme premiere de toutes les vertus, les regit et tempere toutes non seulement parce que " le premier en chaque espece des choses sert de regle et mesure a tout le reste," mais aussi parce que Dieu, ayant creé l'homme a son image et semblance, veut que, comme en luy, tout y soit ordonné par l'amour et pour l'amour.