Hou Jhesu schal be sought, desired, and founden.

Seke thanne that thou hast lost, that thou myght fynde it. Wel y woot, whoso myght oones have an inward sight a litil of that dignité and that goosteli fairenesse whiche a soule hadde bi kynde of the firste makynge and schal have bi grace, he schulde lothe and dispice in his herte alle the blisse, the likynge, and the fairnesse of al this world as stynk of carioun; and he schulde nevere have wil to doo othir dede nyght ne dai savynge the freelté and the bare nede of the bodili kynde - but desire, morne, prai, and seke hou he myght come agen therto. Neverthelees, in as moche as thou hast not yit fulli seen what it is, for thi goostli yye is not yit openyd, I schal telle oon word for alle whiche thou schalt seke, desire, and fynde, for in that word is al that thou hast loste. This word is Jhesu. I mene not oonli this word Jhesu peynted upon the wal, or writen bi letres on the book, or fourmed bi lippes in soun of the mouthe, or feyned in the herte bi traveil of mynde; for on this maner wise may a man oute of charité fynde Hym. But I mene Jhesu Crist, that blissid persoone, God and man, son of Marie, that glorious virgyne, that is al goodnesse, endelees wisdom, love, and swettenesse, thi joie, thi worschipe, and thyn ai lastynge blisse, thi God, thi Lord, and thy savacioun.

Thanne yif it be so that thou felist grete desire in thyn herte to love and to plese Jhesu, either bi the mynde of this name Jhesu, or bi mynde or seynge of ony othir word, or praier, or in ony dede that thou doost, whiche desire is so mykil that hit putteth ought as it were bi strengthe alle othere thoughtes and desires of the world and of the fleisch, that thei moun not reste in thyn herte, thanne sekest thou wel Jhesu. And whanne thou felist this desire to God, to Jhesu Crist (al is oon) hoolpen and comfortid bi gostli myght thorugh light of Goddis grace so mykil that it is turnyd into love and into affeccioun, gosteli savour, and swettenesse, into light and knowynge, into soothfastnesse - so mykil that for the tyme the poynt of thi thought is sette upoun noon ertheli thynge, ne felith no stirynge of veynglorie, ne non othir yvel affeccioun (for thei moun not appere that tyme), but oonli is enclosid, rested, softed, anoynted, and comfortid thorugh gracious presence of oure Lord Jhesu Crist, thanne hast thou founden sumwhat of Jhesu. Not yit Hym fulli as he is, but a schadewe of Hym; for the betere that thou fyndest Hym, the more schalt thou desire Hym. Thanne bi what maner of praier or meditacioun or occupacion that thou mai have grettest desire to Hym, and have most felynge of Hym, bi that occupacion thou sekest Hym best and best fyndest Hym. Therfore yif it come to thy mynde as it were askand what hast thou lost and what sekest thou, lift up the mynde and the desire of thyn herte to thi Lord Jhesu Crist, that blissid maidenys sone, though thou be blynd and not mai see of His Godhede, and seie Hym hast thu lost, and Hym wolde thou have, and nothynge but Hym, noon othir joie, blisse in hevene ne in erthe, but Hym, to be with Hym wharso He is, and to see Hym and love Hym. And though it be so that thou fele a litil His goostli presence in devocion or in knowynge, or in ony othir gifte what it be, reste not therinne as though thou haddest fulli founden Jhesu and wolt no more seken aftir Hym, but ai be desirande aftir Jhesu more and more for to fynde Hym betere, as thou hadde right nought. For wite thou wel, what that thou felist of Hym, be it nevere so mykil, yhe, though thou were raveschid into the thridde hevene with Poule, yit haste thou not fulli founden Jhesu as He is in His joie. Knowe thou or fele thou never so mykil of Hym here in this liyf, He is yit above it.

And therfore yif thou wolt fulli fynde Hym as He is in the blisse, cese nevere while thou lyvest of praiers and of goostli desyrynge.